Највисок шатор на светот

Највисокиот шатор на светот, во кој има трговски центар, забавен парк и плажа, во вторник се отвора за посетители, објави Би-Би-Си.

Центарот Кан Шатир, што го подигна британската архитектонска компанија Фостер и партнерите, се наоѓа во Астана, главен град на Казахстан, и е висок 150 метри.

Шаторот се отвора на 70-тиот роденден на претседателот на Казахстан, Нурсултан Назарбајев, и на 13 годишницата на Астана како главен град на таа азиска земја.

Кан Шатир е поставен на 20 метри висока бетонска основа, е највисок објект во Астана и највисок шатор на светот. Во него се наоѓаат и продавници, ресторани, кина...

Внатрешноста на големиот шатор, чија изградба траела четири години, е заштитена од температурните промени кои во Астана се драстични - од 30 степени на лето до минус 30 степени во зима.